అస్థిత్వ ప్ర‌తీక‌.. ఆమె పుస్త‌కం.

“ఆమె” ఇది పుస్తకం మాత్రమే కాదు, మ‌హిళ‌ల అస్థిత్వాన్ని, వారి విజ‌యాల‌ను ప్ర‌పంచానికి తెలియ‌జెప్పే విజ‌యాల స‌మాహారం. సాధార‌ణ మ‌హిళ అసాధార‌ణ విజ‌యాల సంపుటి. అన్నీ నిజ జీవిత క‌థ‌లే. అంద‌రూ త‌మ జీవితాన్ని జీరో నుంచి ప్రారంభించిన వాళ్లే. క‌ష్టాలు, అడ్డంకులు, చీత్కారాలు అన్నీ ఎదుర్కొని త‌మంత‌ట తాము జీవితాల‌ను చ‌క్క‌దిద్దుకొని న‌లుగురికి ఆద‌ర్శంగా నిలిచిన మ‌హిళ‌ల జీవిత క‌థ‌లు ఈ పుస్త‌కంలో ఉంటాయి. 20 మంది మ‌హిళ‌ల స‌క్సెస్ స్టోరీలు ఉన్నాయి.

మ‌హిళ‌లు త‌లుచుకుంటే ఏ రంగంలో అయినా సాధికార‌త‌ను సాధించ‌గ‌ల‌ర‌ని నిరూపించేందుకు ఈ పుస్త‌కమే సాక్ష్యం. ఇందులోని మ‌హిళ‌లు వేర్వేరు రంగాల్లో విజ‌యం సాధించిన వారున్నారు. ఒక్కొక్కరిదీ ఒక్కో నేప‌థ్యం. అక్ష‌రాలు రాకున్నా ఎంచుకున్న వృత్తిలో సాధికారత చూపినవాళ్లు కొందరైతే, ఆధునిక జ్ఞానంతో సాధికారత చూపినవాళ్లు మరికొందరు. స్త్రీ కావటం పాపం అనుకునే ఎంతోమందికి అలాగే మ‌హిళ‌లు ఏమీ సాధించ‌లేరు అని భావించే ఎంతో మందికి.. జన్మంటు ఉంటే స్త్రీ గా పుట్టాలి అని క‌నువిప్పు క‌లిగించే పుస్త‌కం ఇది. కాళ్లు లేని వాళ్లు, కండ్లు లేని వాళ్లు, గ్రామీణ మ‌హిళ‌లు, ఆధునిక మ‌హిళ‌లు ఎన్ని సాధించారో కండ్ల‌కు క‌ట్టిన‌ట్టు చూపిందీ ఆమె పుస్త‌కం.